Page 63 - Grito hacia Roma

Aj kaambesajo’obe’ ku ka’ansik ti’ mejen paalal
jump’éel ki’ichekelem sáasil ku taal k’áax;
ba’ale’ ba’ax ku k’uchule’ junmúuch’ xsi’is oko’ob
tu’ux ku yawat u áak’ab ko’olelil k’uuxil.
Aj kaambesajo’obe’ ku ye’esik yéetel k’ub óolal u nukuch wóol p’óok k’ujnaj p’ulta’an,
ba’ale’ yáanal tuunil kili’ich wíiniko’obe’ mina’an yaabilaji’,
jumpuli’ mina’an yaabilaj yáanal u néenil icho’ob.
Yaabilaje’ ti’ yaan te’ej bak’o’ob xe’exek’a’an tumeen uk’ajilo’,
te’ej mejen najo’ob ku ketlan muuk’o’ob yéetel búulkabilo’;
yaabilaje’ ti’ yaan te’ej jool tu’ux ku ba’ate’ u kaanil wi’ijilo’,
ich le ok’om óol k’áak’náab yúuntik u wíinklal jkimen ch’íich’ilja’o’
yéetel ichil le t’úub éek’joch’e’en jup’uch ts’u’uts’ yaan yáanal k’áamjo’olo’.
Ba’ale’ le jnuxib sáask’ale’en u k’abo’
yaan u ya’alik: yaabilaj, yaabilaj, yaabilaj,
táan u papaxk’a’ata’al tumeen u piktunil k’as kimeno’obe’;
yaan u ya’alik: yaabilaj, yaabilaj, yaabilaj,
ichil u pits’il nook’ ku xíixmukuytal yéetel ki’iki’ óolalo’;
yaan u ya’alik: jets’ óolal, jets’ óolal, jets’ óolal,
ichil u tsink’alaankil xotob yéetel bojonja’ ku wáak’ale’;
yaan u ya’alik: yaabilaj, yaabilaj, yaabilaj,
tak u p’áatal saklemle’en máaskab u bóoxel u chi’.

Ka’alikile’, ka’alikile’, ¡ay!, ka’alikile’
le jbooxo’ob jóok’sik u nu’ukulil túubo’ob,
le xi’ipalaal ku kikilaankil yáanal u sajbe’entsilil le jo’olpo’opo’obo’,
le ko’olelo’ob buulul u ni’ob ich yibil tsaatso’,
u piktanil máako’ob yéetel u bajab, yéetel u jink’i’ paax wáa nookoye’,
yaan u yawat kex we’ek’ek u ts’o’omelo’ob ti’ pak’,
yaan u yawat tu táan u wolis óok’ol k’ujnaj,
yaan u yawat chokochaja’an u pool tumeen k’áak’
yaan u yawat chokochaja’an u pool tumeen ye’eb
yaan u yawat chuup u pool yéetel ta’,
yaan u yawat je’el bix tuláakal áak’ab much’a’ane’,
yaan u yawat yéetel u kaal tajan ma’aschaja’an
tak u káakik kikilaankil noj kaajo’ob bey meyej xch’úupalaale’
tak u jenko’ob u k’alabilo’ob tsaats yéetel paax.
Tumeen k-k’áat waaj utia’al ktséentikbáa sáamsamal,
u ts’its’ibkil lool yéetel xma’ xulbe’en yaabilaj ku yoxo’ompajal,
tumeen k-k’áat ka’ ts’o’okbespajak u yóolaj lu’umkabil,
Ku ts’áak u yich utia’al tuláakal máak.

61