Page 81 - Grito hacia Roma

Nà sá ñá’à ra sá kua’a na nà kuàchì
iin ñu’u yé’è kéé vàxì xìnì ikú;
ndísu ña xáa kú iin yùvì chítú ñà’à yakuà
nùù iin ndá kávà tìkuxí kue’è kúun tìxì.
Nà sá ñá’à ra iin ndiàkua ísítí na sá ñá’à nda’á na ko’ndo xìnì veé ñù’ù;
ndí tìxì ndióxì ita ini ve’e ñù’ù ra kòò ñá tò’ó, kòò ñá va’à,
kòò ñá va’à, kòò ñá tò’ó tìxì nduchí nùù ndióxì.
Ñà và’à ñà tò’ó ra nùù íyo sòko nùù íyo ñà ndáchì ini va íyo ña,
ini ve’e ndàxi xí’ín sàvi va íyo ña;
ñà’à và’à ra ini yàvì nùù kani tá’án kuè’è xìni tiàa va íyo ña,
ini itiá ñú’ú suchí ini nùù táni sàmì válí nìxì’ì va íyo ñà
nùù xí’i yu’ú tá’án yo tìxì tìkachí va íyo ñà.
Ndísu ra veló yé’è nda’á ra
kachi rà saá: ñà va’à, ñà nduvi, ña sìi ini,
ñà kúsuchí ini tá kúú yàà nà xà númì kuvi xa’à;
kachi rà saá: ñà va’à, ñà nduvi, ña sìi ini,
nduvi kándita tá iin yùvì lo’o pá’a nùù tìkòtò su’un;
kachi rà saá: táxììn, yàyàà, vii ní,
tá mà’ñú yù’ú ndikó xí’ín ko’ndo kui’i ñu’ú ká’ndì;
kachi rà saá: ñà va’à, ñà nduvi, ña sìi ini,
ndiakuà ná ndayè’è yu’ú ra kutié’é ña nduu ña kàà táxà.

Ndísu ñà tákà’án, mí ña tákà’án ra, ¡ay!, mí ña tákà’án ra,
nà tià ndiàà táva tùxìí ra sá tiatiá na kàà,
ndià kuàchì váli kísi ña ñú’ú nda’á na ché yaaa ndíso xí’ín ve’e kàà,
nà sì’í kándiàà xí’ì ini ndutiá sìkuì itún,
ti’vi yùvì ndúu ndiee, ndúu yolí, ndúu vìkò,
nda’yù nà saá ni ndiàkuà ná kuun na xìnì ná ndìka yùù va,
nda’yù nà saá ndíta na yé’e ve’e ñù’ù,
nda’yù ndiaa nà tá na yùvì ñu’u
tá na yùvì ì’và,
ñú’u si’ví xìnì na nda’yù ndiaa nà,
iin tá ndá’yù ndiaa tá kúu ndi’i ñùú,
iin tiákí tiákí ndà’yù ndiaa nà
ndiàkua ná kàndà ñuu nà’nú tá kísie nà kuàchì sí’i
ra saá ná kuiñá tàchì ná ve’é kàà nùù íyo tiá sìkuì, nùù íyo yaa,
chi kúmánì ixtà kuxi yó ndi saá kìì,
tá iin ita ndoko yaa tá iin ñà tò’ó kóyò ndi saá kìì,
chi saá ké xìnù yu’ú iníi saá yùví
yùví ñà sákuá’nu tá kúu ndi’i yó.

79