Page 92 - Grito hacia Roma

90
Poema traducido por
Yuli Ceneida Diaz
a la lengua nasa yuwe
Naa poema’
Yuli Ceneida Diaz Saniceto
fxi’jnxi’ nasa yuwete
Jxpi’txi’tha’w nasa wala’s kwe’sxtxi wẽse’jkhaan, romate jxkaasa
(Naa fxi’jnxisa’ Torre Chrysler Buildingju yuusa’)
Zxiçxkwesa yuwe ki’ yuwe thênxsa’, pa’yatxmeete’ na je’zsa nxuuçxa nasawe’sxtxi
yuwe thênxsate kaa kûhu’jun. Naa thênxsa yuwe’ çxhaakwesameeta’ jîiçxa’ seena’
psuuwu’k lupekwe ûste’ txîhpa nxûunxa’ ewusamenxakha’. Txã’wênxçxaa naa
puuyi yuwetx pa’yatxmeete’ kwe’sxtxi nxuuswa’j êen kûuhuna ki’ khpâ’ vxituna.
Naa yuwe thênxsa’ âkhee thegte’ zxiçxkwek thegu’ napa ew dxiihu thegtenxu’ naa
puuyi yuwe’ kwe’sx nasatx ew psuuwsa’, knxûusu’jsa’, jîiçxa’ knxûusu’çxha ee
kapekawu’jsa’. Txãapa’kate kwe’sx fxî’zenxisatx yahtxte’ nxusnxuh êenk kûuhu’
yuwe na’ thênxsasu skhêwsate’.
Kwe’sx ûus dxiihu yaatxnxisa’ jxuka psuuwnxinxa’ja jxuka kazx vxitnxinxa’ ũste’
ikh we’wete’ yuwe thênxsatek wetena ya’ kûuhu. Teeçx jxkaasayak puutxwe’weçxa
naa yuwe thênxsa’s meen math jĩte’ weh ya’ pheewu’jxa’ ãjanaw. Txãa pa’kameĩitx
kwe’sx we’wenxisatx suwçxa’ kwehkweka atxhitxhi’jna skwêwu’. Naa puuyi yuwe’
ki’ çe’jnxi yuwe kwe’sx fxi’zenxiĩs suwnak kûuhu’ kwe’sxtxi yuwe thênxsate txikna.
Txãa pa’kate pûçxhwa’jsa peejxtha’w ki’ thegu’g pu’çxhwa’jsa. Uu een kûhte’
jxukaysa pçuuna u’jwetxina txã’wena’ tximpa kwe’sxtxi pû’çxhwa’jsa uymeena’w
vxite pu’yakhwa’saapa pçuute’.
Naa ẽensu’ nasa meh wala ûuna skhẽwte’ pedayanxuupa ãhanximeetha’w, naa
êen kûhte’ thê’nxunxi’ peejxina jîiçxa’ txã’wênxçxaa peçxkanana skhewûutxna
uusatxi pendanxinxa’ju’. Jîiçxa’ kwe’sx kiwe ki’snxisa’ jxuka vxituna skhêwûuna.
Teeçx thê’saçxaapa neenxuçx ki’snxi yuwe’s e’ste yuusatx kahiyu’jmeete’ jimee
walana kãhatxna. Jîiçxa’ vxite aka’s jiyumetxna aça seena’ thênxthe’ nxûuna. Nasa
txihtewe’sxma’k nxuunapa jxukaysaatx ya’ we’we.
Naa yuwe thênxsa’s pheewu’jmeeçxa’ kwe’sx dxi’jas aphna vxite e’ste yuusatx
dxi’ja’s aphna kûuhuna’w. Txã’wênxçxa kwe’sx uu een kûhuçte’ pçuuwa’j ẽena’s
yaatxina’w, jîiçxa’ seena’ nxusçxa ki’ kuçxyahtxya’ uweena’w. Napa naa nxusnxi een
kûhte’ nasawe’sxa’ jiinxa’çxha çxhãçxha yuhuwa’ja’sçxaanxa’ yaatxitxna. Jiiçxa’
kwe’sx nasa’ puuyii wa’ja’sçxa nxa’ uythasutxna, jîiçxa’ kuçxyahtxmeenxa’txn
txãawêsx iiçxa puuyi êena’s ipaakweçxa.
Naa yuwe thênxsate’ peswee yuwepa jûhu’k nasatxi psuuwna, napa yaatxnxisa’s
suwmeçx, tâ’çupameete’ txejx ji’punxi’s sxu’wêdnxa’ ewuna. Iweeçxnxi yuwe’s
ki’ jxthaakweçx yaatxnxi’s. Ew fxi’zesa’ ki’ ew u’psa’ jiimetxna vxitewe’sxa’ ma’w
fxi’zeçte’. Txãa pa’katx u’ywe’sxtxi’ penxkãhame napa txãawê’sxa’ fxthaanxuuçx
nasatx jîpuya ewu’tx.