Page 89 - Grito hacia Roma

Urek kusrenɵpelɵpe, tsip umpu kutri tɵr ke kurneikwan kusrentrap inchentɵ,
kusrenɵppe pí pa, peipa, katɵkan chillik meranpa tulishá lintishape kusrennan. Trek
kutrintre katɵ-katɵ namik traship mayu ampán. Kusrenɵpelɵpe, kusrenam kailan kɵpa
kusrenanan; inchatre urepe chiwantɵ kucha kekɵ ashchap kaiman, untaramuweielɵ
misrik pasrán. Kekɵ ashá untarapelɵpe, trentɵ mu kua isua mɵrá, kɵmpa kuallip
amɵñipelɵ kɵn, pi mai welula ip metɵpenma, lamɵ pu yau kutri asamik kɵn; mayan
kɵpen parɵ purampá merɵpelɵpe chiwantɵ kucha untarapelɵ kɵn, mɵi ɵyampalasrɵ
chinetɵ purɵ isumtelei utu tsutsiktɵ kena misrɵp mentɵpen, kɵmpa isumik nepupen
kip ken kimɵ, isumik nepun. Inchentɵ namui kuallip tasikmerá chap kɵllikreiklɵpe,
kɵmpaik ku chintrun, mutɵkucha yantɵ kuantrappe isua mɵr chintrun, kɵmpá, nu
nepua isuik nutɵ; Chippe: mayampesrik utukucha, piishintɵ kɵmik kɵn chintrun;
Chippe: trik ken param chipe, untak palá kɵmik kɵn tan.

Tru katikpe… yalɵ nɵm misakmerán, nɵm tuteikwan weren, matsɵrek urekmera
nɵmui marampurap kekɵ kusrewa maren, ishumpur mɵkelɵ isua mɵrmɵ tap
mantikawan mermap mapene, asrú netsawá isrɵntrap kaimantrun, yantɵ mutɵ kucha,
chi kuintɵ kucha nu sɵtɵ misrá ampá isua mɵrinkatikpe, nɵtrɵ pulelan trasán,…
namik trasán, namik isún, nui turyupe kaik wantɵ isup, chi yem merawantɵ kucha,
paleik latawei pirɵ ken kɵnampatɵ trashintrun, yautu mera wansrɵm kucha latátɵ
pirɵ kɵnɵntrún; mɵi yampalásrɵ, pulelɵ nem asiktɵ wayá kasrɵ pɵnsramik ya
tamariele kɵp, incha trutɵ kɵmɵ, nɵmuiwane tapik kui, kena marɵp kuikpe, chap we
srutrɵpentɵwei chish misrtrun. Kakentɵ, mutɵkucha kualɵm mɵrik mamik wanwei
paíp kɵn. Pintsú u latawei, nui kɵm, kɵmyu kɵmik kɵn. Ka kentɵ namui Nupirau, chi
kɵpiktɵ kucha, nɵmui kɵm kɵmyú, kɵpen; atsí kɵpelɵpe, mamikyik ellweilɵ latá-latá
kɵpentɵwei kekɵ misrtrún.

87