Page 93 - Grito hacia Roma

jxkasa’ kwe’sxtxi dwe’wesa’, txã’wênxçxaa kwe’sxtxi penxkãsa’, txãa pa’kate
kwe’sxtxik pheewu’ju’jna kûuhu’.

Vxite ju’gu’ vxuua’ nasa’s suwsaaçxa’, peswee vxitna jîiçxa jxukaa suwu’k kwe’sx
fxi’zenxisa’s. Cxhaakwemesa’s ji’puçx ewmee athte’ txã’wmesaiiçxana. Çehnxi’
yuwe ki’ nxusnxi yuwe isuuthçxatx fxi’ze piiyayuwete vxite nasa wala fxi’zenxisate.

Napa teeçx nasa ew fxi’zesa’s nasnasana’ kyaatxi’jthe’ wêdxnxi yuwete
usma’tha’wyuu vxite thenxsate ũsçxapa ja’daçxah pu’çxhna ũste’ wêdxnxisa’
vxyaana. Thê’sa’ kĩhaspa ew jiisa ki’ ew keçx fxi’zesa’, wêdxnxi yuwe’s na’sawe’sx
pẽhnxte’ txâ’ pu’çxhyak yaatxi’ nasawe’sx penxpa’ka uu êen kũhna u’jweçpa’ka.

Napa naa wedxnxisa’ yuwe teeçx wes zuzkwena’wêsaçxa’ napa ew seelpisa’,
kwe’sx ûus dxiihu ûusyatxnxisatx jxukak ãate kutxiji’ naa thênx yuwe ki’ ûunxii
yuwe ma’wênteyçxaapa pçuuwa’j ji’pa kwe’sx wêt fxi’zenxi’s uyya’ ewukaan. Wêt
fxî’zwa’ja’s ki’ wêdxnxi yuwe’s pakwee ji’ptha’w, kwe’sx we’wenxi seelpisa txãa pa’ka.

Weh nxuhpa yuhumeena’w, ew çxhãçxha yuhuwa’j ji’phta’w. Nasa mjîi vxituççxapa
ewmee vxithte’ wehnxuhpa ewmesana’ thegu’me. Txãa pa’ka piçtatxwe’sxa’ ûukhutx
thê’sawe’sxtxi vxite jxkaasatxi. Txã’wenxçxaa u’ywe’sxtxi’ txteçxah ki’ nasamenatx atna
fxi’zete vxite seelpisameeta jĩnatx we’we. Naa yuwe meh seena’ thê’nxthe’sa, napa naa
yuwe thênxthe’sa’ teeçxsahĩçxameea’, nasa makwetey ũstxtha’w txãawêsxi jxuka’.

kwe’sxa’ puuyina’w Çxhãçxha yuhuçx ki’ txã’wênxçxaa kwe’sx we’wenxi’s
ãate ji’pçxa’ ûuk êena’s ji’pumeena’w, yuwe thênxthe’sate kũhma’thaw napa
txã’wênxçxaa uu een kũhma’k napa.

kwe’sxa’ puuyina’w Kwe’sx çxhãçxha yaatxnxi’ ki’ kwe’sx we’wenxi’; ne’jwe’sx
vxite’ jxkasaa jĩnatx u’jwe, kwe’sxtxi txhitxҫxa ji’pupa’ka ki yuwe thenxsatx
ku’le’nximee ji’pu paka, kwe’sxa juuna’ yahtxçxa ki’ pnxuuskwe yunxiite
kwe’sxpa puuyii ji’ptha’w.

kwe’sxa’ puuyiina’w Fxiy yaatxsa pa’ka ki’ nasa fxi’zenxi’s yaatxsa ũspa’ka kwe’sx
puuyinxi’ yuhumeena, naa yuwe thênxsa pçuu ja’dameea’, naa yuwe thênxsate
usçxa’, kwe’sx puuyiinxi’ teeçx yuwe thênxsak dvxiitu’ ikasawe’sxtxi.

kwe’sxa’ puuyiina’w ja’daçxah wêt wêt fxi’zewa’ja’s uyya’, txã’wênxçxaa
txihpa peejxmee le’çxkweçxaapa jxuukaysa kiwe pe’lakwe ji’puya’ ewuuya’.
Vxuua’ walanxuh nasatx suwna pa’kh, peswee vxitna jîiçxa’ jxukaa suwk
kwe’sx fxi’zenxiisa’s.

91