Page 125 - Grito hacia Roma

Li jchanubtasvanejetike chak’bik yil untik
li jkits t’ujumal xojob ch-antale te yut te’tike;
k’usie a’no’ox te tsobol chk’ot epal xabetik
te yu bu ch-avanik li yik’al sme’jom ak’ubal k’ak’al o’ntonale.
Li jchanubtasvanejetike te sjunul yo’nton chak’ik iluk li smuk’tikil pomtabil pajni’ jolnaetike,
k’usie te yolon lok’tombailetike muyuk k’uxbinel,
muyuk k’uxbinel te syol sbek’ sat li nene.
K’uxbinele te’o te xcho’bil bek’et taki o’ntonal,
te bik’tal xanvital na li sk’elojsba chnoj te o’e;
Li k’uxbinele te’o te ch’en yu bu xvolej xch’etlej sk’ak’al yo’nton vi’nale,
te j-ich’mul nab snikilan chamen sakikil mutal nab
xchi’uk te yik’al ts’islajetel buts’el te yolon xonjolale.
K’usie li mol sakbits’anik sk’obe
xlik yal tana: k’uxbinel, k’uxbinel, k’uxbinel,
nichim no’ox yo’nton yu’un li epal j-altsajeletike;
xlik yal tana: k’uxbinel, k’uxbinel, k’uxbinel,
te o’lol sluchbenal stsiltsunel k’uxbinel;
xlik yal tana: utsilal, utsilal, utsilal,
te o’lol skitskunel kuchiloetik xchi’uk slo’bolal bombaetik;
xlik yal tana: k’uxbinel, k’uxbinel, k’uxbinel,
a’ to me ts’ilts’unaj li sti’il yee.

Yakil to o, yakil to o, ¡e!, yakil to o,
li j-ik’aletike slok’es stubinajelik,
li kerem viniketik xt’elajan te saklikan xi’el yu’un li jpasmantaletike,
li antsetik jik’avenik te jmilvanej xepu,
li epal martiyoetike, li epal kits’kits’e mu’je li epal toketike,
te xvochet manchuk me xpamambat xchinam te k’alna,
xlik ch’ietajuk te yeloval muk’tikil pajni’ jolnaetik,
xlik ovil k’ak’al ch’ietajuk,
xlik ovil sikil ch’ietajuk
xlik ch’ietajuk nojem te tso’ li sjole,
xlik ch’ietajuk k’ux-en nopen xa’i skotol ak’ubaletike,
xlik ch’ietajuk xchi’uk sjatemal nuk’
a’ to me xt’elajan te xi’el k’uchal tsebetik li muk’tikil jteklumetike
anta svok’ik lok’el xepu chukebal xchi’uk sk’inaltak.
A’ li te jk’antik jve’eltik jujun k’ak’ale,
anta iximtabil sbatlajal k’uxbinel sakil nich te’,
yu’un te jk’antik chk’otuk te pasel stsatsal yip li balamil
chi smak’linukutik jkotoltike.

123