Page 39 - Grito hacia Roma

Mbo’ehára ohechauka mitãnguérape
tesakã iporãmbajepéva oúva ñúgui;
katu oguahẽva tepoti renda atýraicha
osapukaihápe kuña paje pochy vai.
Mbo’ehárakuéra ohechauka ogahoja apu’a hatatináva
katu yvypóra ra’anga’atãguýpe ndaipóri juayhu,
ndaipóri juayhu itaju satĩpaha resaguýpe.
Mborayhu oĩ so’ópe osoropáva yuhéigui,
óga vaimi ojepytasóvape, y osururúva rehe;
mborayhu oĩ umi kuárape ñembyahýi mbói oñorairõhápe
para ñembyasy omyatimoihápe umi guyratĩ re’ongue
ha ñehetũ hüetépe oikutúva arambohaitaguýpe.
Katu karaituja ipo satĩva
he’íne: juayhu, juayhu, juayhu,
orosapukáiva hetaite omanombotáva;
he’íne: juayhu, juayhu, juayhu,
kuatia pererĩ oryrýiva kunu’ũgui apytépe;
he’íne: py’aguapy, py’aguapy,
kyse ha mbokapuha tytýi apytépe;
he’íne: juayhu, juayhu, juayhu,
isa’y kuarepotípeve hembe.
Upe aja, upe aja, ái!, upe aja,
kamba onohẽ joáva ñandyvuha,
mitãrusu oryrýiva mburuvicha mongyhyje sakã guýpe
kuña oñapymimbáva ita kyrakuépe,
avaeta mbotaha, violín terã araíguigua,
osapukáine okapúrõ jepe iñapytu’ũ ogykére,
osapukáine ogahoja apu’a renondépe,
osapukáine tarova tatágui,
osapukáine tarova yrypy’águi,
osapukáime iñakã renyhẽ reheve tepotígui,
osapukáine opa pyhare juajupeguáicha,
osapukáine iñe’ẽsoropa reheve
táva guasueta oryrýipeve mitãkuñáicha
ha ojoka ñandy ha mba’epu kora,
jaipotágui mbujape ñanemba’erã ára ha ára,
aliso poty ha kunu’ũ ojykyipave’ỹva,
jaipotágui oñemoañete Yvy omoañeteséva
ome’ẽva hi’a opavavépe.

37