Page 75 - Grito hacia Roma

Ja yik´ixpëkpi´të tsiuk´extip ja unää´k
tu´uk ja wäjts jä´täjky miti jap memp ujts jëtspy;
miti nekë jä´tp ja axiikyii namyiukyiti
mä´ nyamtë ja koojts tsu´ kiijx miti myët´ät´tip ja mëjk pä´m
Ja yik´ixpëkpi´të nyikumitip ëy ja mëj tsaptëjk´kupäjk nuko wäjts,
kaj´pa tsojkën te jap juky´ätën piajktkipy,
nikapa tsojkën te jap mä ja ween tsyiamäm´ijts.
Jap ja tsojkën y´ijts äjkjëtspy miti nawyaxiyip mët ja tëëjts,
jap mujtsk tijkjëtspy miti myitanajpy ja nëjkoom;
jap ja tsojkën jutjetspy mäy jamajatäjkänti miti yi´ooktip säm ja tsäntsi,
jap me´jy jëtspy miti ayoop ku tsijk tsaneny ja në´winkajk´pë miti tiy ojk´nitë
jits jap mä nuko koojts ja tsu´jkx yëjtsy jap kukëy pajtkijpy.
Ja majäy miti yi kyë tajänäjxp
në´mp ja win´ajtsy: tsojkën, tsojkën, tsojkën;
amitoojitip namay ja jääytsië miti ayootip;
në´mp ja win´ajtsy: tsojkën, tsojkën, tsojkën,
jap tsu´ wyetjëtspy mä nuko yuunk y´atijtsy;
në´mp ja win´ajtsy: kunujkx, kunujkx, kunujkx,
jap mä ja tsuujx myupëjptë jits mä ja peejk miti tapëtijpj;
në´mp ja win´ajtsy: tsojkën, tsojkën, tsojkën,
kunimp win´ajts jay apäjk y´juunë.

Ku ixa, ku ixa, ¡ay!, ku ixa,
ja yëëjk jääytsë pëny´jut´tip ja tatsuj´tä´jk
ja unäjk´të pën ayootip ku myupep´të ku myikapxiti jay anampëti,
ja të´xëjkt´të yukxëptip mët ja on,
namay ja martillë´të, ja mutsk kow uk ja yoojts,
tsapäjp ja win´ajts ëy yja yijk mitejpets ja kyukëjx jam pëtsywemp,
tsapäjp ja win´ajts jam tsaptëjk winkë,
tsapäjp ja win´ajts nuko jënë,
tsapäjp ja win´ajts nuko xu´xë,
tsapäjp ja win´ajts ku ja kyupäjk nuko niti´ny,
tsapäjp ja win´ajts säm ejtp ja koojts ku nyamyujkiyiti,
tsapäjp ja win´ajts mëjt jay ayuujk wenk y´ukwinänë
kunim yi käjp´të myupëp´tëp säm ja kiijxtsi
jits tpot´tip ja puxëjk on jist ja suun.
Ja ku atëm ntsëkyinti ja tsapkajky japom japom,
pijy miti ja´kp jits yuunk yik ijkx,
ja ku atëm ntsëkyinti jits yi nääx yik patump,
miti yajkp yi tsiëëm jits nitukiyi mpätintip.

73