Page 71 - Grito hacia Roma
P. 71
Chjinie xojoon xi bokoyaa ja kjindii
ngo isien tsjakji’í xi ndibáni nguijin k’ijñajan;
tangá xi fo’a ta ngotsi jonta kjoa porítika
ñanga kjandaya choxifìtjien nguijin ñánga kjijñó.
Chjinie xojoon tokotsja mejen ndikon ndikon toko nangoxi ndi tjingo,
tanga nguindiee toko nangoxii jmijin xi tjoó xkjiin,
jmijin xi tjoó nguindie ndyik’on chitsen xi jé tjíngo.
Kjoa tjoo nguijin yojo kixii xi xindaa tikon,
Nguijin ndi ndi’ya xi ts’enkjatje yojoo nguijin stsee:
kjoa tjoo tikon ñanga kjifot’ajin yojoo ye xi bojoo,
ñanga tikon ndajee xi ‘bitjiya nisié xi tjijmasón ndajoaa
kojó nguijiin ndsó xki’á xi tsabo’á nguindie njño ‘binguikoo.
Tangá tsjaa kjan xinga xcha
bikotso: kjoa tjo, kjoa tjo, kjoa tjo,
nguijín njño xira xi ya’á kjoa tjo;
bikotso: kjoa xió, kjoa xió, kjoa xió,
nguijin ‘naa kichiro kojó ngo kató ni tsen;
bikotso: kjoa tjo, kjoa tjo, kjoa tjo,
ndanga chobaa kicha tibá skjibe ts’oá.
Tangá, tangá, ¡já!, tangaa,
xota jmaa ndyi’boxie nda ntia,
ja xongoo fotsiéma nga be xota xi tjon ndya,
íchjiin nguijin isitii t’ananguii ndyifí nganda,
xota kjiin xi chjaa martiyo, njñi kojó ndi,
skajndayáá toko nangoxii,
skjandayáá ndií tsabee,
skjandayáá ch’an tsabee,
skjandayáá nda nguijin toko nga tsangoyajin ye’e,
skjandayáá xikots’en kjandaya ngayeje nixtjien,
xikots’en kjandayájo ndaa nga je kixijen
ndanga kjotsie ngayeje naxinanda xikotsa ngo tsakjinchi
kó xtjox’a ndoba yá isiti kojó só.
Ngot’e mejejne pan tsajin ndyojon ndyojon,
naxo tsjie xi ya’á kjoa tjó xi kamaxi,
ngot’e mejéjne nga kjotjoson één t’ananguii,
nga tsjáá tóó tsi’e ngayeje ngasondie.
69
