Page 107 - Grito hacia Roma

Jorhéntpiriechaksï jorhentasïnti sapiratiechani
t’intskua sesi jasï ma énka juatarhu ueratini jurhajka;
joperu énka janojka tankuarhikua atsïmu sïpiaristi
énkaksï uinhachka pápk’asï ninfa ikichakueri.
Jorhéntpiriecha t’antsïrsïnti k’erati k’umpujtsïkuechani sïuarati,
joperu tsakapuri úkatecharu ketsïkua no jarhasti uempekua,
no jarhasti uempekua éskuecharu énka pímpinharaka.
Uempekua atakuarhikataru jarhasïnti k’arichakua jimpo,
k’umánchikua sapichu jimpo énka kuajpekuarka para orhekua no pani;
uempekua jarhasti jauanikuecharu énka akuitsïcha k’arimakueri apejperhajka,
k’eri japontarhu énka manharatajka gaviota uarhírichani
ka pápk’asï putimukua énka tsuntsúritajka iájchakuarhu ketsïkua.
Joperu t’arhépitiri t’ik’asï jánjkicha
arhiati: uempekua, uempekua, uempekua,
kurhajkuarikua uanikuecha jimpo énkaksï uarhíkuaterkuka;

arhiati: uapekua, uempekua, uempekua,
kutsúmutarakuaru xáni xénchperakueri jimpo;
arhiati: sés pájperhakua, sesi pájperhakua, sesi pájperhakua,
ts’irinaskakua j’tatarakua plateri ka charharakua melonisïri;
arhiati: uempekua, uempekua, uempekua,
hasta énka jamperi penchúmikua plateriuaka.

Jimajkani jamperi, jimajkani jamperi, ¡ay!, jimajkani jamperi,
turhípitiecha énkaksï petajka t’uatatarakuechani
tumpiecha énkaksï tsïrintsïrijkujka cheta orhéjtsïkuricheri jimpo,
kúxarheticha mípchakurakata ampakiti tamakua jimpo,
uanikua chátatarakuecha, kústatarakua violín o janiku jatakueri,
uinhachati ankiruka k’uaninharitaka muroarhu seso arhíkatani
uinhachati k’umpujtsïkuarhu erotatini,
uinhachati tantójchati ch’ipiri jinkoni,
uinhachati tantójchati iauakua jinkoni,
uinhachati kuatsïta uinijtsïtini,
uinhachati eska uanikua chúrikua kuntakata,
uinhachati arho arhochaparini
énka jamperi k’erati iretecha tsïrintsïrijkuaka eska nanakecha
ka kakanturini k’atapekua tamakuaeri ka kúskakueri.
Jimpokaksï uejka kurhinta pauani pauani anapu,
tsïtsïki énka ioni jamperi tsïpajka, piurukata xenchperakua
jimpokaksï uéjka eska úkuarhiaka ampe eska Echeri na uejka,
énka intsïpejka akuá para iamintuecha.

105