Page 139 - Grito hacia Roma

aka tü antakaa wanee akotchirawaa sutuma yarüttüsüpüleeirua
eere kookotüin naya sümaa sü’ürüla naa’in.
Na ekirajüliikana ne’iyatüin ataa mulo’uyuu maluwajeemajüsü;
aka jiyuupünaa ayaakuwaakalüirua nnojotsü alee,
nnojotsü alee ne’rüin o’uu jerottakana weinshiree.
Aleekaa yalasü sünain e’irukuu awasajaakaa sutuma miñaasü,
sulu’u miichichon eejiraakaa sümaa epirajaasükaa;
tü aleekaa sulu’usü ishiirua eere natchinjiraain sarut jamüsitshii,
sulu’u palaa mojukaa aa’in a’yuunajakaa kapiootairua outusü
jee sünain tü ousajaa aikaa alio’u shiyuupünaa ekiipalaairua.
Aka chi laülaa warattakai ajapüirua
mataaleechi yaa: alee, alee, alee,
achuntunüshi natuma miyonniirua ajalajüinain aa’in;
mataaleechi yaa: alee, alee, alee,
na’akapünaa chi seerakai kutkuttüshi talatüsü naa’in;
mataaleechi yaa: anaa, anaa, anaa,
sa’akapünaa rüipishana jee meruunairua asotoojüsü;
mataaleechi yaa: alee, alee, alee,
wane’ereejeerü jerottapüitaapa niimatairua.
jiasa’a jujuuna, jiasa’a jujuuna, ¡aay!, jiasa’a jujuuna,
na yuuitalii ayulakana tü awawaapalekalüirua,
na tepichi kutkuttakana sheema naashiyain ekiipu’ukana,
na jieyuu shirokukana süseitain ipashira,
tu wattakaa saalii mattiiya, tali’raai joo siruma,
a’waateerü jaitairü a’yaatünüin jikiisholoin sünain ejepüseekaa,
a’waateerü shi’ipoo’ujee ataakalüirua,
a’waateerü sümamainajüin jaisükaa,
a’waateerü sümamainajüin saamatsükaa,
a’waateerü sümaa watüin shikii chü’ü,
a’waateerü müin aka aikalüirua supushuwa’a,
a’waateerü sümaa matchinshaanain shikiisa
wane’eree sukutkujaapa alijunapia müin aka jimo’onnuu
jee napüttüi sütchin seitakaa jee jayeechikaa,
aka wacheküin weküinkaa paan sükalu’u ka’i,
süsii aliiso jee aaliiwaa amalaijuushi weinshi,
aka wacheküin ayatüinjatüin tü sümakaa Mma
kachonkalü wamüin wapushuwa’ale’eya.

137